Quesionario

Ho Respeitu Wain hau husu leitor blog nee atu responde quesionariu ida nebe sita ona iha sorin.

Itaboot nian resposta sei sai dadus sample bah au atu hakerek kona ba transformasaun Fundu Petroleu  ba dezenvolvimentu  

FUNU CAILACO (1725-1726)

Hakerek iha okos nee sita husi ForumHaksesuk.blogspot. Intensaun husi re-publikasaun bodik habelar liutan parte Estoria Funu Timor oan hasoru kolonialismu. Obrigado boot ba Author Dom. Carlos Filipe Ximenes Belo.SDB. Ninian esforsu tomak hatuun pagina estoria ida nee. Estoria nee sita iha pagina Nee Nian

Dom. Carlos Filipe Ximenes Belo.SDB.
Eis Bispo Apostolica Diocese Dili

Kona ba revolta boot ne’ebé liurai hosi Loro-Monu sira halo hasoru malae mutin, Padre Artur Basilio de Sá, hakerek livro ida, ho título: “A Planta de Cailaco 1927” (1949). Planta ne’e, dezeñu ida ne’eb’e ema goes ida mak pinta kona ba assaltu forsas governu halo hasoru asuwain Loru-monu iha foho Cailaco (Kailaku). ( Iha Cailaco Foho nebe uluk ema subar halo funu maka Foho Loelaco )

Foho Loelaco ho Lesu Luli, Caicalo

Ita hatene ona katak governador Jácome Morais de Sarmento (1706-1710) haruka kobra imposto. Reinu hotu-hotu selu imposto atu defende Prasa Lifau. Reinu balu la konkorda. Liurai balu mos la konkorda ho governador António d’Albuquerque Coelho (1722-1725) ne’ebé duni sai hosi Lifau amo Bispo Dom Frei Manuel de Santo António.

Iha tinan 1719, liurai Camanasse halibur liurai balu iha ne’ebá atu estabelese aliança (saun). Sira oho asu aman makerek ida (mutin-mean); hafoin sira hemu asu ne’e nia ran kahur ho tua mutin; tuir mai sira kombina atu duni sai malae portugés hosi Timor; sira hakarak duni sai mos amo lulik dominikanu no sobu uma kreda no kapela; duni sai mos ema hosi Larantuka.

Iha tinan 1722, reinu Luca háu revolta hasoru governu. Entretantu, governador António d’Albuquerque Coelho haruka kapitaun Joaquim de Matos no soldado sira atu hahú kobraba kobra imposto iha reinu sira, iha Província do Servião. Maibé, Liurai Lolotoe la simu ordem governu nian, no duni Kapitaun Joaquim to’o Batugadé. Liurai Camanasse revolta, hodi hamriik funu hasoru governu: Nia bolu liurai sira hosi Lamaquito (ou Lamak-Hituka, Bobonaro), Lolotoy, Caelaco, Lohitu (Leo-hitu), Sanier (Sanir), Atsave (ka Atesabe), Lâmean (Lei-Mean), Asafonara, Dirivate (Diribate), no Hera-Mera, Nusadilla, Clora, Letipho (Letefoho), Marobo, no seluk tan. Liurai “revoltosos” sira ne’e iha planu atu harii iha Timor impériu tolu: Sonobai (Sombai), Camanasse, We-Hali.

Funu hahú iha tinan 1725, iha Cailaco. Liurai sira ne’ebá hetan tulun hosi Dom Francisco Hornay, hosi Oe-Kusi no ema Larantuka.

Funu-nain timor hahú sobu uma-reda, harahun estátua no kruz, naok no sobu sasán misa nian, oho amo lulik nain rua: padre Manuel Roiz no padre Manuel Vieira, no sarani barak.

Entretantu to’o iha Liafau Governador António Moniz de Macedo (1726-1728). Liurai balu, hanesan Dom Francisco Hornay haakrak buka paz (maibé laran rua-rua ka finjidu), ba “presta vassalagem” ba governador foun. Maibé, liurai balu halibur ema funu-na’in rihun haat (4.000), hodi ba monta kuartel-jeneral iha foho Cailaco, hanesan reinu Lamaquito no Caelaco. Liurai Cailaco naran Dom Aleixo no Dato Laku-Mali sai hanesan ulun boot ka comandante ba revolta hasoru malae mutin..

Haree ba situasaun ida ne’e, governu husu liurai balu atu funu hasoru “revoltosos” sira: reinu Maubara ho nia liurai Dom Francisco Xavier; reinu Viqueque ho nia liurai, Dom Vasco dos Santos Pinto; reinu Samoro ho nia liurai Dom Bernardo Sarmento.

Iha fulan outubro 1926, governu haruka kapitaun Joaquim de Matos, hosi Batugadé, no kapitaun Gonçalo de Magalhães, hosi Dili, atu komanda forsas hodi ba assalta Cailco.

Reinu sira ne’ebé funu hasoru “ koligasaun Caelaco-Lamaquito”, iha foho Cailaco mak tuir mai ne’e:

1.      Viqueque: Liurai Dom Vasco dos Santos Pinto, ho kapitaun-mor Dom Ventura da Costa dos Remédios; ho soldado rihun ida atus rua (1.200);

2.      Reino Claco: Liurai koronel Dom Belchior Fernandes;

3.      Reino Allas: Liurai coronel Dom Miguel de Sousa Tavares

4.      Reinu Manufahi: Liurai Koronel Dom Duarte da Costa Souto Maior;

5.      Reinu Samoro: Liurai Koronel Dom Bernardo Sarmento, ho soldado na’in 900.

6.      Reinu Laclut:, liurai Dom João da Fonseca.

7.      Reinu Ai-foi: Liurai Dom Domingos da Costa, ho soldado na’in 30.

8.      Reinu Suai: Liurai Dom Baltazar Lopes, sargento-mor, ho soldado na’in 600.

9.      Reinu Motael: Liurai Dom Gregório Roiz Pereira, tenente-koronel, ho soldado na’in 500.

10.  - Reinu Liquiçá: Liurai Dom Gregório, sargento-mor, ho soldado na’in 100.

11.  - Reinu Calcuc: Liurai Dom Paulo de Cáceres, ho soldado na’in 60.

12.  - Reinu Laicor: Liurai Dom Carlos, h oso soldado nai’n 40.

13.  - Reinu Manatuto: Liurai Dom António Soares, ho soldado na’in 400.

14.  - Reinu Vemasse: Liurai Cosme de Freitas, ho soldados na’in 900.

15.  - Reinu Laleia: Liurai Salvador, ho soldado na’in 300.

16.  - Reinu Sarau, Liurai Dom Álvaro da Costa, ho soldado na’in 80;

17.  - Reinu Faturó: Liurai Dom Sebastião, ho soldados na’in 80.

18.  - Reinu Luca: Liurai Dom António Aveiro do Amaral, ho soldado na’in 1.500.

19.  - Reinu Dailor: Liurai Dom Álvaro de Sousa, ho soldado na’in 100.

 

 Além de “moradores” timor oan sira ne’e, governu haruka tan kompañia sanulu resin sia (19), ho ema na’in 970. Forsa sira hosi governu inklui mos ofisial no soldado portugés, ema balu hosi Goa no Macau. Atu assisti tropas sira n’e, iha mos padre kapelaun ida: padre Vigário Dili nian.

 

Atu hasoru tropas gvernu portugés ho moradores sira ne’ebé liurai sira haruka, Dom Aleixo, liurai Caelaco nian, fo ordem atu populasaun evakua ba foho Cailaco (Kailaku). Ema mane, feto, foin-sa’e, labarik, ba hotu akampa iha foho leten. Sira mos duni sa’e ba foho leten balada: bibi, kuda no karau, fahi no manu. Balu ba hela kuak laran; balu hada kastelu ho ai-rin no fatuk; mane asuwa’in sira lori diman, rama-isin, surik, ai-donan, no kilat. Kilat balu iha kilat musan, balu iha pólvora no balu uza fatuk.
 

Iha loron 26 fulan outubro 1726, kapitaun Joaquim de Matos ho nia tropas monta akampemnto iha foho Caelaco nia hun. Iha tempu ne’e, sira titu “inimiguu”, sobu no sunu uma ka “pos” ne’ebe asuwain Caleco sira harii nanis. Iha loron 29 to’o mos tropas hosi Maubara no Coutubaba funu hasoru funu-nain tsira ne’ebé un hosi foho lolon. Nei-neik forsas portugés sa’e to’o foho klaran. Iha ne’e, asuwian sira halo tiha ona trankeira boot ida sukat quilómetru tolu; iha fatin nee, “inimigos” sira halot ai-han, sana, bikan, kusi, luhu no buat seluk tan; fatin ne’ebá mos iha we-matan ida. Atu tama tranqueira ne’e susar liu. Topas balu tem ke sa’e tuir hali-hun sira abut ne’ebé tabele to’o rai. Hosi tranqueira aswain Caelaco tiru hasoru, tiru ram-oan no duir fatuk mesak bob-bot deit ba karaik, to’o oho soldado no mordor sira. Iha asaltu ba tranqueira ne’e, ema hosi Caelaco, na’in 80 mak mate. Ho ataque ne’ebá, “revoltosos” balu halai ba foho tutun, balu aba foho sorin, balu fali konsege halai to’o foho Atsabe nian.
 

Iha fulan novembro 1716, forsas hosi Dili no loro sa’e too Caelaco. Forsas konjutas halo serku ba foho Caelaco durante loron sanulu resin rua, maibé asuwain sira la rende. Hosi subar fatin iha foho, feto balu ho labarik sira tun ba kuru be, iha be-matan. Feto no labarik balu ema kaer; balu halai kalon, balu oho-aan.

 

Ho situasaun ida nee’, liurai Dom Aleixo, no dato Laku-Mali ho tan dato balu ba rende iha akapemto portugés, maibé ema wa’in ne’ebé subar iha fatu kuak no ai-laran lakohi tu no la rende. Kapituan Joaquim de Matos husu ba Dom Aleixo, atu selu imposto, entrega kilat no armamentu seluk. Entretantu, udan boot tau maka’s, mota tun, kalohan no abu-abu taka metin rai no dalam sira. Tamba ne’e, dato balu no sira emar halai hikas ba foho. Ikus mai, Joaquim de Matos ho Gonçalo de Magalhães haruka forsas sira serka foho Caelaco: balu hosi lormunu, balu hosi loro sae, balu hosi tasi-mane, no balu hosi tasi-feto, la husik funu-nain Caelaco sira sai no tama.

 

Iha loron tolu fulan dezembro, asuwain sira tun hosi foho ataka fosas governu nian no oho tiha sargento-mor Lucas da Cunha (male mutin). Iha loron 5 fulan ne’ebá, forsas governu nian deside atu fila ba Díli, no Batugadé. Tuir dalam sira mos hetan atake hosi funu-nain balu. Joaquim de Matos lori hanesan dadur Liurai Dom Aleixo, ho dato Laku-Mali hodi ba entrega ba governador iha Lifau.
 

Iha tempu ne’ebá malae no moradores lalin revoltoso sira nia karau hamutuk rihun rua (2.000); sira teci ema inimigu na’in atus ida limanulu (150) nian ulun-fatuk; lori dadur ema na’in 168.Tuir dadur sira lian, sira nia maluk n’ain 300 mak mate iha foho leten. Hosi tropas portugés , ema na’in tolu nolu resin walu (38) mak mate, no brak mak kanek. Iha loron 8 fulan dezembro forsas sira ne’ebé fila ba Prasa/Dili, tuir selebrasum misa iha Tibar.
 

Maibé funu Caelaco la remata iha tinan 1727. Tanba governador sira nia hahalok, no divizaun iha Liurai timor sira let, sei akontese revolta barak. Istoriador balu katak dame lolós harii metin iha tinan 1787!

 

Operasaun sira hosi Air Timor ba Bali sei pára to'o 14 Setembru

Aeroportu Nudar Odomatan bot ida alemde odomatan seluk hanesan iha fronteira  nian. Nudar Nasaun Soveranu Timor Leste Persija hadia netik nia oin bodik fo impresaun  ba-bainaka wainhira visita ita rain.

 

Ate 2015 Portu Nicolau Lobatu Comoro Dili seidauk bele simu aviaun boot atu halo landing tanba deit Portu refere ninian metru halai badak liu atu akomoda aviaun boot hanesan AirBus.

 

Portu Dili so bele atende aviun sira kategoria Boeing nian nebe kiik. Nudar Nasaun laos Distritu no Provinsia Timor Persija hadia infrastruktura Portu liu liu Dili nian.

 

Hau hanoin sai moe boot ida, karik ita kompara  Aerportu Comoro Nicolau Lobato ho nasaun capital  sira seluk. Sensibilidade no patriotismu persija forte hadia sasan publik nee. Ita iha kapasidade finanseira. Menus deit rekursu no implementasaun. rekersu menus implika tebes servisu birokrasia estatadu, entertantu sei fo implika ba implementasaun.

 

Atu Atrai Investores  no torismu impresaun permeiru mak odomatan sira ema tama sai.

 

 

Artikel ida nee foti hosi sapotl Iha Nee

Desizaun ne'e hatete iha komunikadu ida nebe fó sai iha kalan ne'e hosi Air Timor, hafoin kansela tiha viajen rua, ligasaun entre Denpasar, iha Bali, no kapitál timoroan nian no entre Díli no sidade indonéziu nian.

"Tanba kestaun sira nebe lahó kontrolu hosi Air Timor, planu nebe previstu hosi voo indonéziu Citilink nian (Denpasar-Díli-Denpasar) kansela tiha iha loron-tersa dadeer", refere hosi empreza liuhosi komunikadu.

"Ho laran-triste maka ami informa katak ami tenki hapara temporáriu operasaun sira voo nian entre Denpasar-Díli-Denpasar entre loron 02 to'o 13 fulan-Setembru", esplika iha komunikadu.

Empreza, nebe la klarifika nafatin motivu sira suspensaun voo nian, refere katak operasaun sira sei hahú iha loron 14 fulan-Setembru.

Pasajeiru atus resin senti afetadu iha Díli no Denpasar (Bali) tanba kanselamentu ba voo nebe previstu ba loron-tersa nebe halo hosi Air Timor no nebe hodi hahú aranka ho kontratu foun ida ho Citilink, subsidiáriu hosi Garuda Indonézia.

To'o loron 31 fulan-Agostu, viajen loron-loron hosi Air Timor ba Bali no hosi Bali halo diretu hosi Garuda, maibé hahú iha loron-tersa ne'e, 01 fulan-Setembru, hala'o hosi Citilink.

Fonte hosi setór ne'e esplika ba Lusa katak problema ne'e hahú ho voo nebe tenki uza ba viajen hosi Bali ba Díli (no karik sei fila ba Indonézia), nebe laiha dimensaun nebe Air Timor hakarak.

Aviaun ida seluk nebe disponibilizadu la hetan autorizasaun iha Bali hodi semo ba Díli tanba boot liu ba pista.

Iha komunikadu nebe fó sai iha loron-tersa ne'e, Air Timor esplika katak "aranke nebe planeadu hosi semo sira Citilink Denpasar-Dili-Denpassar nian hetan atrazadu/adiadu", lahó detalle ba kauza loloos sira problema nian.

"Diresaun hosi Air Timor serbisu maka'as hela hodi hetan apoiu hosi Governu Timor-Leste nian iha diskusaun urjente sira ho funsionáriu governamentál indonéziu sira no funsionáriu lokál timoroan sira", nia adianta.

Empreza hatutan ona katak fornese hela apoiu ba pasajeiru sira nebe afetadu, hodi buka solusaun alternativu ka fó fali osan hosi folin billete sira nian.

"Ami preokupadu tebes ho saida maka akontese no ami sei fornese beibeik informasaun atualizadu", nia hatete no hatutan katak voo sira hosi empreza ba Singapura la afetadu ida.

Mário Romaldo, diretór hosi Aeroportu Nicolau Lobato, iha Díli, garanti ona ba Lusa katak problema hosi semo ne'e la'ós ho Aviasaun Sivil, konfirma ona katak fó ona autorizasaun hodi hala'o semo sira ne'e.

"Air Timor iha akordu ida ho Citilink no iha baze ba akordu ne'e maka aprezenta ona dokumentu sira ba Aviasaun Sivil, nebe fó ona autorizasaun no aprova ona semo sira nebe hala'o hosi Citilink", nia esplika.

"Hosi parte aviasaun sivil laiha problema. Problema ne'e la'ós hosi ami nia parte. Agora iha entre Citilink no Air Timor", nia hatete.

Formalmente, Air Timor tenki kontrata kompañia aéreu sira seluk ba ligasaun sira ho Timor-Leste tanba nasaun ne'e seidauk bele lansa Air Operator Certificates no sertifikadu sira seluk nebe importante ba operasaun nasionál sira.

Voo sira hosi kompañia aéreu Sriwijaya entre Denpasar ho Díli laiha problema ida.