Labele Hamlaha Iha Rai Bokur Nian Leten

Desde inisiu  independensia mehi Timor oan atu moris iha prosperidade hanesan ho nasaun seluk sempre prega metin iha ema hotu nian neon. Hanesan ema barak hatene luan area soveranu Timor Leste mak 15.007kilo metru kwadradu, nebe ho ninian karakteristiku geografika barak mak foho nebe fo moris ba ekosistema haleu nia.

Laiha duvidas populasaun Timor barak liu sei moris iha seitor to’os, natar, peskas no pekuaria ho volume produsaun kiik no valor nebe naton. Produtu husi ita nian toos nain peskador no hakiak animal seidauk produktivu tebes. Produsaun nebe hetan bodik liu atu uja konsume ba uma kain idak nian, ituan deit maka faan ba merkado. Ita tengki buka tuir lolos no identifika faktores saida maka halo ita nia produsaun defisil ka susar atu sa’e no kontribui ba prosperidade ekonomia.

Nudar nasaun kiik -nurak ho ninian populasaun 1.066.409 ( Sensus 2010) no liga ba karakteristiku vida ekonomia nebe sei menus produsaun bele dehan sistema agora nebe sei akontese iha rai laran mak ekonomia subsisten katak produsaun nebe hetan barak liu uja ba atu konsume duke faan iha merkado. Alende situasaun iha leten ita tengki honestu mos katak menus infrastruktura hanesan estrada diak kontribui barak ka ituan oinsa bele fasilita mudansa produtu entre fatin ba fatin.

Husi deskrisaunn hirak nee hatur karakterismu komum nebe akontese iha nasaun nebe foin desenvolve hanesan: nasaun menus rekursu humanus ka edukasaun, menus iha area infrastrutura no sentralijadu sistema governasaun iha vida ekonomia nebe kontribui ba progresu ekonomia em jeral.

 Karakteristiku Ita Nian Sistema Arikula

Toos nain ita nian dependente ba tempu udan monu rai hodi fila liman, situasaun nee susar atu kontrola maibe, estadu bele fasilita ho meus seluk hanesan hadia irigasaun no introdus vini nebe forte no kondis ho klima Timor nian. Seitor peskador iha potensialidade nebe boot atu moris iha merkadu Timor. Potensialidade nee persija hatur iha plano nebe metro ho posibildade atu hetan lukru iha merkadu rai laran no bele haluan ba merkadu sira seluk. Potensialidade seluk husi seitor pekuaria(peternakan) bele dehan iha potensialidade boot nebe persija hetan suportasaun husi Estadu liu husi plano nebe diak liu husi peskija no dadus atu meta desijaun.

Seitor potensial hirak nebe temi iha leten bele dudu ekonomia uma kain no kontribui ba dezenvolvmentu ekonomia rai laran. Estadu persija investa makaas iha seitor nee tanba 63% populasaun (dadus sensus 2010) Timor Leste moris husi seitor nee. Ita persija mapa dezenvolvimentu seitor nee para targetu nebe klaru iha planu ate to’o eksekusaun ho orsamentu sufiseinte.

Politika desenvolvimentu seitor agrikula labele sai deit hanesan mehi maibe tengki tau iha praktika. Ita persija estuda husi nasaun seluk tanba saida maka sira nian seitor argrikula bele kontribui ba sira nian Nasaun. Realidade hatudu foos nebe faan baratu iha Timor mai husi rai liur. Se nune ita persija buka tuir atu nune motiva ema; Tanba saida maka foos importsaun bele faan baratu iha Timor? Sira uja metode saida? Sira nian sistema irigasaun hanusa? Sira nian Klima hanesan ho Timor ka lae? Sira nian karakter rai hanesan ka lae?  sira uja teknologia ida nebe? Sira uja Fini saida para kualidade diak? Sira nian toos nain uja rasik sira nian rai hodi produs ka sira  servisu Estadu selu sira deit? No perguntas barak liu tan depende ita hakarak estuda husi ema nebe avansadu liu iha seitor nebe ita hakarak eksplora.

Iha seitor peskas ita hatene Timor riku ho ninian tasi nebe luan  signfika rekursu nee sei iha potensialidade nebe persija eksplora diak liu tan. Tuir estimasaun Minesteriu Agrikultura no Peskas hateten por volta kada tinan Timor lakon 200 Milliaun afeita husi  ilegal fishing (STL,03 Juli ‘ 13) ho deskrisaun nee identifika persija duni servisu integradu entre ministeriu relefante ho ita nian seitor siguransa atu salfa guarda riku soin iha tasi Timor nian. Refere ba riku tasi laran nebe barak seidauk eksplora entaun planu  politika nebe Estadu merese tau atensaun maka oinsa metodelogia kaer ikan kwantidade barak maibe seguru. Kestaun seguru laos deit uja bero ka rooh peskas nebe uja teknoligia ass maibe, seguru persija tau atensaun bodik sustentabilidade ekosistema moris iha tasi laran liu husi kuidadu ahu ruin no ai-horis  tasi nian.  Atu realija mehi nee persija hakarak nebe forte liu husi planu no targetu klaru nudar mapa dezenvolve seitor peskas Timor. Introdusaun ba peskador oinsa hetan ikan kwantidade barak persija hetan asistensia husi agente estadu nebe relevante, no ita bele uja ema matenek husi rai liur hodi transfere siensia aplikabel ba ita nian peskador.

Timor Leste nasaun kiik no kiak iha Asia. Peskija ida halao husi fundu monetariu internasional  indika ba ita hotu katak tanba menus produsau rai laran obriga Timor Leste halo importasaun liu-liu bodik ai-han nebe atinji 60%  iha tinan 2010. Tuir relatoriu refere  numere nee hatuur Timor Leste nudar nasaun nebe dependensia aas liu karik kompara ho Nasaun rendementu kiik seluk iha Asia laran.( IMF :2011). Numeru dependensia boot nee indika ba Timor oan hotu atu servisu makaas oinsa bele hamrik metin liu husi hasae prudasaun rai laran.

Konsidersaun Investimentu Tempu Naruk

Ita persija sentru estudu nebe hala’o estudu peskija atu nune inovasaun teknologia no hamosu metode foun fasilita didiak liu tan ita nian argrikultor sira. Peskijador bele mai husi sentru formasaun estudu hanesan nivel Universidade relevante no nivel Estudu ass sira seluk. Sentru Peskija bele kria husi Estado rasik ho objektivu hamosu kreatividade no difersifika metode nebe bele serbe ba vantajen ita nia povu agrikultor hotu.

Fihir rekursu nebe Timor iha indika menus tebes pesoal nebe kredibel iha assuntu hasae produsaun argrikula rai laran. Exemplu konkretu maske Governu ho inisiativa diak tenta hasae produsaun aihan rai laran liu husi fahe traktor liman ba grupo toos nain sira maibe ita seidauk hare resultadu positivu iha tinan hirak ikus nee. Foos nebe sirkula iha merkadu laran sei barak liu mai husi importasaun. Tengki honestu katak laos fasil atu sustenta rasik ai han ba ita nian nasaun maibe ita labele mos mantein posisaun refere ho durasaun naruk see karik ida nee akontese bele perigu ba Nasaun alende tengki hasai osan halo importasaun no implika ba hamenus riku konta estadu no politikamente ema bele uja ai-han nudar forsa politik nebe bele hamate esperitu servisu agrikultores nian.

Investimentu iha rekursu human persija tau atensaun tanba, hanesan temi ona iha leten mayoria povu Timor Leste sei servisu  barak liu iha seitor nee. Dudu no suporta ita nian intelektual sira hodi estudu iha nivel edukasaun nivel ass. Intelektual hanesan Dosente nudar formador ita nian gerasaun, estadu merese haruka no suporta sira aumenta kapasidade iha estudu nebe ass no kwalidade iha fatin barak ho objektivu  transformasaun siensia ba estudante iha nivel relevante sei sai diak no kwalidade forte. Husi mekanismu transformasaun matenek hanesan nee maske neneik maibe los sei responde perguntas wain oinsa hasae kwantidade no kwalidade produsaun no tenta redus importasaun sasan produtu agrikula nian.

Rekursu naturais nebe labele renova hanesan mina ho gas persija utilija ho didiak antes mohu. Laiha ema ida bele nega kontribusaun mina no gas ba desenvolvimentu nasional. Hanesan iha tinan 2011 Governu uja osan fundu minarai 81% hodi investe liu husi Orsamentu Estadu. Maske area produsaun mina no gas iha tasi no rai leten bele fornese fundu dezenvolvimentu maibe servisu iha area refere la fo servisu ba ema wain ho rajaun servisu area mina no gas persija matenek intelektual nebe spesifikamente ba ema enjeneiru area refere.  Esperansa wain nomuru dependensia ba fundu refere bele redus tinan ba tinan liu husi hamoris seitor seluk nebe kontribui ba rendimentu Estadu.

Wainira seitor agrikula forte no produs makaas Entaun, saida maka Estadu persija kria atu nune produtu hirak nee labele uja ba han deit maibe kontribui ba sira nian ekonomia. Responde ida nee laos fasil hanesan ema fila liman no taka lima deit. Planu integradu persija tau iha konsiderasaun, planu nebe merese konsidera maka bele hanesan loke kampo servisu nebe barak ho nune ema bele sosa produtu hirak nebe ita nian belun sira produs. Planu seluk nebe merese hetan atensaun boot maka fatin faan ka merkadu nebe organizadu ho objektivu alende fasil kontrola maibe husi merkadu maka estadu foin bele aplika taxa kontribusaun ba negosiante sira hodi  kontribui ba rendimentu Estadu. Metodde aplikasaun taxa ba produtu faan depende approsimasaun nebe estadu fihir katak la hatodan negosiante no estadu hetan mos lukru liu husi investimentu nebe kleur halo tiha ona.

Fasilidade hanesan merkadu persija hetan atensaun boot. Merkadu tengki sai duni fatin interesante ba ema atu sosa sasan, Se lae merkado bele luxu maibe menus visitantes sei la fo moris agrikultor sira.fiar katak estudu reabilidade no peskija relevante persija halo atu nune ita iha planu no referensia nebe diak no kondis ho ita nian situasaun.

Estadu iha papel importante proteje no promove sidadaun sira nian vida nebe diak. Dalan ida nebe merese hetan porsaun atensaun boot maka area nebe emar Timor oan barak moris. Seitor nebe maka ema Timor barak nian han fatin mak natar, toos, tasi no hakiak animal. Seitor sira nee kwandu forte  fo impaktu sosial ekonomia ba ema atu moris iha prospioridade laran. Seitor hirak nee karik forte tebes alende ita nian ema bele ona moris diak kontribui mos estadu atu bele redus dependensia sasan importasaun se nune implika mos redus kapital Timor semo ba rai liur no uja halo investimentu iha rai laran hodi haforsa ekonomia rai laran.

Estadu liu husi governu persija tebes introdus mekanismu nebe merese uja hodi hasae produsaun. Ba ida nee Governu liu husi ministeriu relevante persija kria egente estadu nian hanesan ekstensionista nebe sira nian objektivu prinsipal servisu maka oinsa introdus kunyesementu ba ita nian ema oinsa mekanismu diak  hasae produsaun. Agente estadu nee tengki iha kualifikasaun nebe kobre area sira nian servisu.

Maske plano hotu diak maibe atu hetan suksesu iha plano nee maka kriasaun servisu. Karik ema laiha servisu entaun abilidade sosa iha merkadu kiik  ho nune fo impaktu direita ba total produsaun no impaktu mos ba produktividade produsaun. Servisu nebe temi iha nee laos signifika ema hotu tengki servisu iha institusaun Estadu. Maibe, seitor seluk hanesan seitor privadu lolos sai hanesan pilar dezenvolvimentu ekonomia tanba sira iha papel boot oinsa kontribui ba redusaun ema buka servisu.

Servisu seluk maka ema bele kria maka vida enterpreneur/negosiante. Servisu negosiante laos buat menus valorijasaun. Tanba saida mak dehan nune, tanba realidade hatudu momos ema estrangeiru sira nebe buka moris iha ita rain laos mayoria ho kapital boot maibe sira ho vida negosiante sira bele goja lukru investimentu kiik nee. See  ema imigrante hanesan Cinesa, India, Indonesia bele negoisiu tanba saida mak ita la bele? Ita parese bele maibe ita menus esperiensia no kapital maske kiik oan deit.  Kriasaun servisu kiik nee persija hamoris liu husi sistema kreditu iha banku Estadu nebe hakarak ka lakohi tengki hamoris no proteje ninian sidadaun rasik liu husi vida fila liman duke sira tane liman no husu deit ba Estadu.

Hein katak Estadu iha mehi no hakarak realija mehi oinsa Timor Leste bele sai husi nasaun nebe kategoria kiak. Maske susar maibe ho plano nebe metru no halo estudu peskija nebe relevante bele sai nudar mapa ba dezenvolvimentu nasional. Rekursu la renoval bele hotu maibe oinsa seitor sira seluk nebe Timor oan barak moris ba tengki forte antes rekursu sira nee ramata.

Fila hikas ba topiku artikel nee ” Labele Hamlaha Iha Rai Bokur Nia Leten” sentidu boot tebes no real hare rai bokur Timor barak sei toba hela. Ita persija maka Plano Integrado husi seitor relevante no uja metodoligia mapa potensialidade kada fatin idak-idak. Para atinji mehi  nee politika no plano kurtu praju ( tempu badak) no longu praju ( tempu naruk) tengki iha targetu  klaru no fleksibiladade adjustamentu bodik benefisia agrikultores Timor oan.

Osan Timor Leste Nudar Identitade Ekonomia

    Panorama

Moris iha nebe deit sempre la ses husi oinsa komplementa (pemenuhan) nesisidade vida loron ba loron. Bodik kompleta nesisidade hirak nee ema persija hasai osan.  Osan nudar media ida nebe sai sasukat ho sasan seluk. Atu troka osan ho sasan persija iha fatin ruma ba sosa-nain ho faan-nain hodi halo negosiu kona ba valor ka folin entre osan ho sasan nebe atu sosa. Fatin nemak hanaran merkadu, merkadu loron ohin sai nakloke boot husi merkadu tradisional to’o merkadu internasional nebe ho ninian kompleksidade rasik.

Osan tanba nudar sentral aktividade ekonomia persija tebes hetan atensaun boot iha vida ekonomia. Ho osan ema ka grupo bele realija saida maka sira hakarak sosa, ho osan maka ema bele muda sira nian vida ekonomia liu husi estuilus konsume no bele uja ba rai hela bodik prevene isidente uju ba futuru.

Media osan fasilita ema baiban to’o ukun nain bele iha mehi atu hadia vida sosial no ekonomia nasaun ida, osan karik laiha sei fo impaktu tebes iha realijasaun planu. Kestaun nee hotu hattur ass tebes esensialidade osan ba aktu ekonomia emjeral no ba indivudu hotu.

Istoria uju osan

Iha pasadu osan nebe uja transaksaun la hanesan nebe agora ita hare iha ema hotu nia liman. Osan laos halo husi besi ka surat tahan. Maibe, osan nebe sira uja maka hanesan sasan hirak nebe jarang ema hetan iha emvairomento ida no ema barak kunyese no simu nian nudar moeda transaksaun. Husi rajaun nemak halo sasan nebe nudar osan  iha folin ass. Iha pasadu Sasan hirak nee maka bele uja nudar osan  hanesan ahi, masin, besi, ai-kameli, belak, mortel, hena husi tasi balun no sira seluk.  Maibe, husi periode ba periode evolusaun uja osan hetan ona mudansa tanba ema hakarak osan ida nebe fasil efisien no efektifu no importante liu maka ema hetan konkordansia uju osan refere.

Funsaun osan

Sasan hirak temi ona iha leten nudar osan nebe iha folin hodi troka ho sasan seluk. Akvidade ekonomia troka sasan ho sasan kunyesidu ho naran sistema barter. Barter  sistama osan ida nebe tuan liu iha mundu. Iha Timor Leste sistema barter sei akontese iha fatin balun. Exemplu nebe maka ema rona no hare mak troka sasan entre mane foun ho familia feto nian wainhira iha soru mutu halo estilus ka lia.  Iha fatin balun hanesan sub Distritu Kailako distrito Bobonaro sorumutu lia moris no lia mate sempre troka sasan balun entre parte familia mane (laen) ho familia feto (fen). Sistema troka sasan ba malun nee lolos kedas ho sistema barter nebe uluk ejiste wainhira osan hanesan notas ho besi nebe validu seidauk iha.

Koalia kona ba osan, iha defenisaun no kriateria barak. Osan bele nudar sasukat ida bodik havalor no hatodon entre valor sasan ida ho sasan seluk. Kriteria osan nee barak sa tan iha era modernu no glabalisasaun nebe nakloke entre nasaun ho nasaun sira. Kriteria osan persija prense buat balun nebe hetan aseitasaun. Prinsipiu komum habelit ann iha osan maka hanesan ; Osan tengki iha valor ekonomia, osan tengki bele lori troka ho sasan, osan tengki hetan rekuyesementu legal, osan bele sai hanesan riku soin, osan nudar fator ida hodi dudu aktividade ekonomia.

Ekonomia Timor Leste

Evolusaun sistema ekonomia mudaan depende nesisidade komum nomos depende sikun matenek sira nian perspektiva oinsa kria no responde nesisidade situasaun nebe akontese iha lalaok ekonomia rai ida. Baibain sistema ekonomia fahe ba rua ida mak sistema kapitalissmu no seluk mak sistema sosialismu. Husi sistema rua nemak mosu sistema seluk nebe barak ka ituan sadere ba idelogia sistema rua neba. Diskusaun barak hamosu valor liu no menus bodik favoritismu sistema refere. Maibe vantajen no desvantajen sistema rua nee bele emjeral hanesan tuir mai nee. Tanba sistema kapitalismu valorija tebes kreativitismu indivu-individu para hetan direitu ba sasan balun liu husi sakrifisiu kapital (modal) nebe boot hodi manan iha kompitisaun merkadu. Sikun seluk sistema sosialismu hakarak halakon direitu individu no hakarak liu buat hotu tengki iha tratamentu nebe hanesan. Sistema sosialismu fo poder boot ba estadu atu garante ema hotu nia vida tuir povu nian hakarak.

Sistema kapitalismu ninian vantajen boot liu maka kria kreatividade ba ema atu kontinua halo inovasaun hodi hetan direitu nebe merese prega ba ninian kreatifidade (penciptaan). Nomos sistema nee garante direitu ba sasan nebe ema ida merese hetan liu husi dalan legal. Maibe sistema nee rasik demenui valor sosial nebe maka ema sempre lori wainhira nia moris iha mundu. Sistema nee havalor tebes no ass liu ba ema sira nebe iha fundu kapital.  Oin seluk husi sosialismu nian maka sistema nee iha mehi ida nebe atu kria kondisaun nebe hanesan ba sidadaun hotu maibe sistema nee rasik ignora direitu individu nian ba proprioridade nebe nian iha, buat hotu estadu maka fahe.

Realidade Ekonomia Rai Laran

Kaoalia ekonomia la ses husi produtu hotu hotu nebe valorija ho osan. Estoria ba estoria nebe rai hela ba jerasaun sempre hatutan dehan Timor riku barak ho ninian Ai-Kameli, kafe, minarai, Gas no sira seluk. Riku soin hirak nee kontribui dadaun ona ba dezenvolvimetu ekonomia no baluk sei tenta atu bele explora liu tan.

Sensus populasaun tinan 2010 indika ona numuru popolasaun atinji ate 1.1 miliaun. Nebe kompustu husi labarik ate idade katuas nian. Masqe nune husi numere refere kompostu popolasaun TL barak liu moris iha vida joven nebe sinal ba estadu katak aumenta forsa trabaladores nebe persija hetan atensaun. Perguntas ida persija ita buka tuir numeru joven nebe barak no sei desempregu nee emvolve ann seitor produktivu ekonomia Timor ka lae?  Biban nee sei la koalia asuntu refere maibe biban ida nee hakarak hatuur  deit ekonomia hotu nebe sei lao persija uja osan ida nebe iha base legal no hetan konkordansia entre ema hotu nebe uja.

Hateke realidade desenvolvimentu rai laran indika momos sitema ekonomia Timor-Leste maka adopta sistema kapitalismu nebe fo liberdade ba ema hotu atu kompete iha merkadu. Masqe sistema nee fo liberdade aktividade ekonomia maibe lolos nee karik fihir didiak kahur ona ho sistema sosial kapitalismu nebe Estadu esforsu makaas halo interfensaun merkadu wainhira akontese disekualibriu aktividade negosiu ekonomia iha merkadu. Exemplu kiik indikasaun merkadu libre nudar indikasaun sistema kapital hanesan movementu sasan tama fasil iha portu Timor nudar sasan importasaun. Bele dehan ate tinan 2013 estadu liu husi governu seidauk interfere kuatasaun ruma ba sasan balun nebe tama iha Timor laran. Anglu seluk indikasaun sistema sosialismu nebe Timor Leste adopta iha ninian vida ekonomia maka hanesan interfensaun estadu liu husi governu kria no garante reserva aihan hanesan foos masqe liu husi importasaun no faan tutan be agente negoisu sira ho presu nebe baratu kompara ho foos lokal nebe folin ass. Argumentu nee hotu hakarak fo sai momos katak iha mundu modernu hanesan agora laiha nasaun ida maka adopta idealismu nebe pure hamrik mesak maibe barak liu maka kahur. Maibe, idealismu kahur nee ninian pesu todan entre rua neba maka sai faktores determinante nasaun ida ninian sistema afilia liu ba sira ida.

Fila hikas ba topiku nebe hakerek. Sistema oinsa deit atu hetan suksesu iha implementasaun nian fakores determinante mak osan. Laiha osan planu sei la realija, husi osan mehi nebe idelogia sira fira bele atinji. Tanba idelogia hotu diak maibe realijasaun mehi husi idelogia persija tebes osan.

Valor osan iha nasaun ida depende ba produtu hira maka bele produs iha fulan ate tinan nia laran, koresponde ho ida nee tengki iha mos singkronijasaun entre total sasan iha merkadu ho total osan nebe sirkula. Entre fungsaun rua nee karik la balansu sei fo impaktu ba folin sasan iha merkadu no afeita direita ba valor osan ida.

Ho adoptasaun sistema ekonomia nebe libre fo ona dalan ba produtu rai liur atu bele asesu faan produtu iha rai laran.  Asesu produtu liur mai iha merkadu rai laran  sei fo ninian impaktu boot ba reserve estadu nian. Reserve nebe sei sai nee sei la fila hikas karik produtu nebe importa la uja bodik halo prudusaun sustenvel nian. Referensia barak husi nasaun sira nebe adopta sistema merkadu livre hanesan Estadu Unidus de Amerika maske, sira uja sitema merkadu livre maibe sira iha sistema proteksaun no quota ba sasan balun nebe tuir sira merese bodik proteje sira nian produsaun rai laran.  Ho ida nee hakarak kompara deit sistema livre laos signifika livre total ho produtu hotu bele asesu merkadu rai laran.

Estoria Osan iha Timor leste
Osan tempu portugues

Hahu tempu kolonial Portugues, sirkula ona osan nebe validu iha merkadu Timor Portugues. Osan nee kunyesidu ho narak Pataka, tuir estoria pataka nee rasik lolos mai husi Cina Macau depois mak hetan karimbu  nebe legalija atu uja iha Timor Portugues. Pataka Timor Leste depois konsege hamrik mesak la hanesan pataka Macau nian maibe lolos nee sira nain rua mai husi agente ida nebe maka Banco Nacional Ultramarinho ;Portugal nian nebe halo operasaun iha teritorio koloni Portugal.

Gambar osan Pataka Timor tempu Timor Portugues sei uja Karimbu

Gambar osan PatakaTimor Portugues nian ( BNU-Dili)

 

Osan tempu Indonesia

Nasaun vijinho Indonesia nebe invade Timor  1975 fo mos implikasaun ba ekonomia rai laran liu-liu oinsa uja osan iha tempu neba. Indonesia Rupiah nudar osan legal durante tempu okupasaun.

Gambar osan Rupiah indonesia

 

Osan tempu Transisaun

Depois referendum, Timor Leste tama ba fase administrasaun transisional nebe fomos konsekuensia uju osan nebe la hanesan husi nasaun barak. Tempu transisaun osan nebe sirkula iha Timor maka Dollar Amerika, Indonesia Rupaih, Portugal Escudo no balun nebe iha maibe la barak hanesan Philipina nia osan. Maibe momentu neba osan nebe familiar liu ho povu Timor maka Rupiah Indonesia maka barak liu ema hakarak uja rupiah duke sira seluk.

 

 Osan tempu ukun ann

Basea ba Lei Untaet nian nebe adopta Amerika Dollar nudar osan offesial Timor Leste fo ona Estadu Timor Leste Liu husi Banco Central fo ona autorijasaun ba ema timor atu uja Dollar amerika deit iha vida social ekonomia ita nian rain.  Prova hatudu duni osan nebe ita uja likuidade tebes no fasil atu troka no lori ba fatin seluk.

Gambar Osan US Dollar Amerika nudar osan Official TL

 

Bele ka lae Timor Leste iha Osan Rasik?

Perguntas esensial ba Timor oan hotu maka nee, bele ka lae ita iha osan rasik? Responde perguntas nee bele mosu pro no kontra. Maibe, iha osan rasik loas deit habelit ann ho valor ekonomia maske ida nee maka pontu importante. Iha osan rasik ba nasaun ida sai hanesan identidade nasaun ida nian liu husi identidade ekonomia. Nebe ninian valor sei la bele sukat ho valor osan. Iha osan rasik halo ita fiar ann liu tan ho ukun ann nebe atinji ona. Osan rasik nia desvantajen no vantajen depende Timor nian kapasidade jere rekursu ekonomia. Reserve Mina ho gas porexemplu bele sai nudar reserve especial ida nebe haforsa ekonomia rai laran. Produsaun seluk nebe mai husi seitor seluk persija moris no sustentavel atu nune ekonomia forte no hamosu invetores foun . So liu husi kria osan rasik maka autoridade monetraria  sira bele halo approsimasaun hodi kontrola taxa inflasaun, kontrola activida bankaria no bele halomos interfensia ba merkaduria.  Definisaun politika monetaria mak hanesan meus ida nebe autoridade kompetente soverano ida halo reaksaun  oinsa bele influensa sirkulasaun osan iha merkaduria bodik salva ekonomia rai laran ho ojektivu mantein poder kompras ekonomia rai laran hanesan traba taxa inflasaun nebe ass liu husi ekspektasaun. Signifika katak politika nee halo atu responde povu konsumedores  nia kbit no politika nemos nudar dalan ida oinsa bele dada investores sira atu investe tanba ekonomia nebe stabel.

 

Gambar identidade Timor Nebe merese sai simblu osan TL

Ho preparasaun rekursu nebe sufisiente husi seitor hotu ita  bele iha hanoin ida oinsa bele kria ona Timor Leste ninian osan  nudar identidade ekonomia Timor Leste. Komesa 2002 Timor Leste adopta Dollar Amerika nudar moeda ofisial ba roda ekonomia rai laran kontrubui tebes ba transaksaun iha merkaduria. Alende Timor Leste iha mos nasaun seluk hanesan Panama, Ecuador, El Salvador, Caribbean Netherland, Marshall Island, Palau no Turk no Caicos Island.  nebe adopta Moeda Dollar Amerikanu nudar moeda Ofisial iha vida ekonomia rai laran. Orgulho ituan ho uja moeda refere tanba famouju iha rai barak ho nune impaktu tebes bodik fasil iha sirkulasaun no likuidade nebe ass. Maibe nasaun nebe deit mak  uja moeda refere lakon ona sira nian indepensia monetaria tanba  Moeda nain hanesan Estadu unidus Amerika rasik maka merese ho direitu tomak halo politika monetario ba sira nian vantajen ekonomia rai laran laos hare ba nasaun   sira nebe hakarak uja sira nian osan.

Dependensia politika monetaria ba Estadu Unidus Amerika neneik maibe los hafraku dadaun ekonomia rai laran. Inflasaun rai laran susar atu kontrola maske Governu hatun ona Lei tributaria, banku komersial sira libre determina osan funan, tanba sekarik banku komersial sira refere ba jurus banku sentral Amerika nian entaun sira sei lakon valor osan nebe kiik liu kompara ho inflasauan rai laran, Por exemplu trimester primeiru tinan nee atinji 1.4 porsentu. Nudar informasaun ate fulan marsu 2013 banku sentral amerika mantein sira nian jurus impresta nian porsentu 0,25 ba kurtu praju nian. Politika mantein jurus empresta iha Estadu Amerika ho objetivu atu mantein inflasaun rai laran nebe kiik no kontroladu ho nune bele salva puder kompras sidadaun Amerika no  ekonomia sira nian pais. Signifika katak jurus impresta iha Estadu Unidus de Amerika determina atu salva guarda sira nian kondisaun ekonomia laos nasaun hotu nebe hakarak uja ona sira nian moeda. Situasaun sei kontrariu karik Timor leste iha ona osan rasik politika monetaria sei basea ba kondisaun ekonomia rai laran.  Orgaun kompetente sira iha kbiit atu regula no traba sirkulsaun osan liu husi mekanismu monetariu nebe merese.

Osan  iha sirkulasaun ekonomia bele kompara hanesan ita raan iha isin. Wainhira raan barak liu bele afeita tensaun no ladiak ba saude no kontrariu mos wainhira raan menus fo impaktu la diak ba isin no saude ema nian. Husi deskrisaun refere bele dehan montante osan persija kontroladu. Realidade hatudu momos barak liu osan semo sai husi Timor laran susar atu kontrola. Situasaun nee bele komprende tanba osan nebe ita uja laos ita nian.

Oinsa Ho Valor Osan Rasik

Tuir sistema Breton Wood valor osan tengki sukat ho reserva osan mean nebe konversi hikas ho osan Dollar Amarika nian. 

Valor osan bele hare husi sikun rua permeiru valor osan nebe iha sirkulasaun rai laran. Ba ida nee sasukat importante maka montante sirkulasaun osan iha rai laran koresponde ho sasan nebe maka sirkula iha merkaduria. Osan nian valor seimenus wainhira sasan ituan maibe osan barak iha sirkulasaun. Bele kontrariu mos osan iha valor ass se kuwandu sasan barak maibe osan naton deit. nomos sei hetan balansiu se karik entre sasan iha merkadu ho osan nebe sirkula hamutuk montante hanesan.

Entaun prinsipiu jeral ekonomia aplika iha neba, estadu ida wainhira hakarak ekonomia ekuilibriu sempre hakarak osan sira nebe iha valor maibe sira hakarak mos sasan nebe ema produs iha valor. Kuidadu equilibriu nee merese hetan atensaun para desenvolvimentu nebe investe hetan lukru ekonomia no sosial
 

Ba kaju Timor Leste kwandu iha osan rasik estadu sei kbiit boot atu sirkula no kontrola osan hirak maka merese sirkula iha ekonomia rai laran.  Estadu liu husi orgaun kompetente bele estimula ekonomia liu husi sistema bankaria nebe defende povu nia interese liu husi kreditu. Estadu ho orgaun kompetente determina osan funan (interest rate) hira mak merese ajuda dudu seitor ekonomia maibe la fo impaktu inflasun boot.

Sikun segundu maka valor osan iha troka ho osan rai seluk ( exchange rate )? Valor ida nee hare liu ba transaksaun iha exportasaun- importasaun no ema estranjeiru wainhira tama ita rain no ita nian ema halo viajen ba rai liur. Faktores dominante ba valor troka osan rasik ho ema nian maka produtu hirak maka ita exporta ba rai liur? Tanba wainhira Timor leste halo exportasaun ba merkadu liur nian bele simu osan iha osan rai destinadu bele simu iha Amerika Dollar no bele  simu ho ita nian osan rasik. Valor osan entre sosa no faan la hanesan. Wainhira ema sosa Timor leste nian osan entaun sei selu karun maibe wainhira sira faan ita nia osan maka sei baratu tanba merkadu finanseiru rekunyese  duni diffrensia nee.  Maske valor troka osan depende ba movimentu exportasaun no importasaun maibe fakores seluk nebe fo influensia ba valores osan nasaun ida mos bele mai husi bomba osan nebe tama iha silku ekonomia rai laran. Bele mai mos husi dinamika politika rai laran nebe manas halo paniku investores sira.

Wainhira Timor Leste iha ona osan rasik, politika kontrola valor osan merese hetan atensaun husi orgaun kompetente. Mekanismu kontrola valor osan lius husi interfensaun merkadu ho ojektifu mantein valor osan iha etapa nebe kontroladu. Situasaun ekonomia Timor Leste nebe kiik persija tebes iha estudu klean wainhira atu adopta sistema kontrola folin osan iha merkaduria. Baibain sistema kontola valor osan uja approsimaun ; libre, fiksu no kahur entre sistema rua refere. Uja sistema libre signifika valor osan iha merkadu depende kondisaun merkadu. Ba ida nee Estadu la persija reserva barak hodi mantein valor sira nian osan rasik. Uja sistema fiksu bodik mantein valor osan signifika katak estadu persija iha reserva barak no boot para interfen merkadu ho intensaun valor osan rai laran estabel nafatin tuir politika nebe determina antes. Karik uja metode kahur entre aprrosimasun rua neba entaun estadu iha politika mantein valor osan tuir nesisidade nebe determina.

Ba kestaun hotu nebe apresenta iha leten hatun fiar ida katak nudar nasaun idependente no ho ninian soveranu tomak sei merese no diak liu sekwandu Timor-Leste prefere iha ninian osan rasik. Tanba, alende orgulho boot nudar identidade ekonomia fo duni impaktu ekonomia ba povu nia vida ekonomia liu husi politika monetaria no jera osan rasik bodik nesesita povu area urbana no rural. Duvidas bele barak no mosu presegisaun oioin maibe iha osan rasik sei fo liu vantajen duke devantajen ba ekonomia emjeral tanba puder kompras rai laran bele sukat ho ninian volume rasik no fasil atu kontrola.

Ikus liu, nudar sidadun Timorense mehi desenvolvimentu ekonomia nebe forte sempre tau ass liu iha interse seluk. Ita persija Estudu ida nebe klean tebes antes kria Osan rasik hodi nune bele fo impaktu sosial no ekonomiku iha Teritoriu tomak.